خالتك أنوش تكتب ... الأمهات المستجدة

الامهات المستجدة في موضوع المدارس ده اللي طالع عينهم شراء حجات المدرسة....ومكلفة بقي أشكال و الوان متعرفش ان كله رايح
تعالى اقولك من واقع خبراتي
حضرتك اول اسبوع bottle بخ (هتضيع يعنى) وعشان كده ازازه مياه معدنية بلاستيك كل يوم وهو نازل المدرسة زي الفل على الاقل هيبقي حريص يخلصها عشان يلعب بيها (الولاد بيحبوا اوى يلعبوا فى البريك كرة قدم بازازة الميه)
تاني اسبوع اللانش بوكس بخ بس اللانش باج ممكن ترجع
على تالت اسبوع تبدأي تتصلي بالمدرسة تدوري على اللانش باج على بعضها
في خلال ال ٣ اسابيع دول المقلمه راحت

و بعدين ترجع من غير أقلام و بعدين تروح و مترجعش
بالنسبة لتوك الشعر للبنات بقا عارفة كيس التوك الاستيك اللى ب 5ج ده وفيه كمية توك هاتي منه لان اى توك هتروح بيها مش هترجع (ضاعت يا مامى) فبلاش تكلفي نفسك بقا بمبلغ وقدره لتوك اشكال والوان مصيرها بالاخر هتشوفيها مرة واحدة ومش هترجع تانى
ضيفي إلى ذلك ان البنوتة هتلاقى راجعة مرة فردة شعرها او فاكة الضفيرة عشان هى وصحابتها اتفقو على كده
طبعا بقا بالنسبة للاولاد حدث ولا حرج القميص مقطوع عادى بلاش تتصدمى اول حاجة تشتريها لادوات المدرسة ابرة وخيط لون اليونيفورم اه والله واتعلمى بقا ازى تخيطى القطع يوميا او يوم ويوم وطبعا حاولى يكون عندك اتنين يونيفورم لان غالبا فى واحد هيتقطع خالص ومش هينفع يتصلح
فى البيت بقا اول ما يدخلو فتشيهم اه والله عشان لو سالتى على حاجة وقالوا ضاعت بالبيت تبقى عارفة صح ولا غلط
مثلا فى كراسة الساينس هو راميها بدرج الديسك مع كتاب الماث وبينكر وبيقول لسه مذاكر حالا فيهم ليكون اخويا رماهم من البلكونة
فاعرفي رجع بيهم ولا لاء كذلك باقى الادوات.

ومش عايزه اصدمك واقولك ان في نوعية أطفال بتسيب بقي الشنطة كلها في المدرسة فدى هتكتشفيها مع التجربه

و ان شاء الله فصل الشتا لما يجي ابقي احكيلكم على رحلة الامهات في البحث عن الجاكيتات والايس كاب والاسكارف.
انا بقولك بالامانة من واقع خبراتى
وعلى فكرة ممكن يكون الطفل منظم بس الضغط وزملاؤه واللعب بينسوه فارجوكي بلاش تتعصبي خليكى عادى لانك مش لوحدك وكله رايح