خالتك أنوش تكتب ..ياحلاوة المولد ياحلاوة
- حبيبي عايزه حلاوة الـ.مولد..
= هش هش دي بدعة ؟! .. انتى اتجننتي ..
- بدعة إيه بس ياحبيبي
= أستغفر الله العظيم .. أستغفر الله العظيم
- فيه إيه بس !!
= ياحبيبتي على أيام النبي ماكانش فيه حلاوة مولد .. تبقى بدعة وضلالة ولا لاء ؟
- ماهو ماكانش فيه حلاوة طحينية وله حلوه اسبريد اللي انت بتأكله.. تبقى بدعة هى كمان يعني ؟
= لاء تفرق .. دى نقرة ودى نقرة ..
- نقرة فى إيه يعني؟
= الفكرة فى الاحتفال يا غاليه .. فى كيفية الاحتفال بالذكرى
- مين اللى قال كدة!
= الفقهاء الشيوخ ياماما .. ..
- قالوا إيه ؟
= قالوا إنها بدعة
- بس دى تبقى بدعة حسنة
= مافيش حاجة اسمها بدعة حسنة وبدعة سيئة .. البدعة بدعة ركزي
- بس مش كل الفقهاء والشيوخ قالوا كدة .. يعنى مافيش إجماع
= يبقى نتقي الشبهات
- شبهات إيه..
= اخرسي ..
- أخرس ؟!
= أيوة اخرسي ..لحوم الفقهاء والعلماء مسمومة ..
- لا حول الله هو أنا غلطت فى علماء ؟
= غلطتى إيه .. دانتى عايزة تاكلى لحومهم يا ماما
- أنا مش عايزة آكل لحوم حد .. أنا عايزة آكل حلاوة
= هجيبلك واحدة جلاكسي بخمسة
- جلاكسي إيه أنا عايزة فستقية
= فستقية .. يا نهار اسود .. أنتى عارفة جرام الفزدقية بكـام؟ .. بكام سيئة يعني .. عارفة بكام سيئة ؟
- ماتحبكهاش بقى وانزل هات
= أنزل أجيب إيه .. انتى عايزانى أروح للفسقة دول وأشجعهم؟ .. دة مافيش واحد فيهم بيركعها
- هات من عند " العبد "
= كمان من عند العبد ؟!! أنتى عايزانا نبيع هدومنا .. ، نبيع هدايتنا واستقامتنا عشان بطوننا؟
- ماحنا كنا بنجيبها زمان
= أيوة بس الكلام دة كان قبل ما تغلـي ..قصدي قبل ما تغلبني التقوى وربنا ينور بصيرتي
طب هاتلي عروسة
= عروسة؟! .. يانهار أسود . أنتى عايزاني كمان ادخّل أصنام بيتي ؟!!
- أصنام إيه بس؟
= مش باقى إلا كدة كمان ..ما نجيب نحات يعملنا هُبل فى الصالة بالمرة
- أنت مكبر الموضوع كدة ليه
= شغلي لنا نحن غرابا عنك بقى .. اجرى شغليها .. اجري . ما خلاص بقينا من كفار قريش
- أنت إيه اللى بتقوله دة ؟.. أنت مكبرها ليه !
= هى كبيرة ياماما .. الحاجات دى مافيهاش هزار .. دى شبهات لازم نتقيها
- بس أنت بتحب اللديدة
= كنت
- وبتحب الملبن
= توبت
- يعنى مافيش فايدة ؟
= لا في ملبن
- هو فين
= أنت الملبن ، ومينفعش الملبن ياكل ملبن
- حِكم يعني بتقول كلام حلو اهو
= طيب حلو ..اديني جبتلك حاجة حلوة ..وهو أرحم من حلاوة المولد
