خالتك أنوش تكتب.. بعد الأربعين

بعد الأربعين الوضع مختلف تماماً
هتشرب القهوة في كوباية أو فنجان مش فارقة
الساعة بالنسبةلك مجرد ديكور على الحائط
هترد على اللي رن عليك 300 مرة ولا كأن حاجة حصلت
ممكن تتصل بحد رن عليك من أسبوع فات وتقوله أنت إتصلت عليا من شوية
هيضحك ويقولك من شوية إيه ياعم حرام عليك
هتقول لإصحابك أنا جاي أهو ومتروحش عادي جداً
والغريب أنهم لما يشوفوك بعدها مش هيسألوك مجتش ليه
هتسمع أم كلثوم وعبد الحليم وعبدالوهاب وفريد الأطرش
وهاني شاكر وغير دول هيبقي بالنسبةلك نهيق حمير
العيد بالنسبةلك مصروف تدفعه
رمضان كوبايةشاى وطبق فول على السحور
الزحمة خنقة وهتدور على الأماكن اللي مفيهاش صوت
هتقصر في الكلام يعنى أخرك الحمد لله وكله تمام وأنت فين يا عم مبتظهرش ليه والحاجات دى
اللي يزعل يزعل واللي ياخد صورة وحشة عنك يبروزها ويعلقها في الصالون
مش هتبذل مجهود عشان تقنع حد بحاجة أنت متأكد منها وعملتها بدال المرة1000
وهتقول للي قالك إن الأرنب بيبيض إنت صح
هتلبس اللي بتحبه حتى لو الكل قالك اللبس ده مش حلو
هتعمل اللي يريحك إنت وبس
هتاكل الأكلة اللي بتحبها رغم التحذيرات اللي بتقول إن فيها ضرر وبترفع الضغط وتعلّى السكر
مش هتفتح مقطع شاهد قبل الحذف ولا سقوط فستان هيفاء وهبي ولا شجرة بتغني ولا تخرج قبل أن تقول سبحان الله
لما تغلط هتقول أنا غلطت ولما حد يغلط معاك ويكابر هتديله فرصة واحدة بس وبعدها أستمارة 6
هتعرف أن الحياة خد وهات وإن كل اللى حواليك أونطجية
هتبقى فاهم اللي بيحور عليك وهتسيبه يحور عشان تحس بالنشوة
محدش هيغصبك تعمل حاجة حتى لو الكل أجتمع على حاجةعشان تعملها وأنت مش عاوز هتقولهم عارفين لو رأسطو عشرةبلدى برضو مش هأعملها
هتسيب الباب مفتوح في حياتك ولا هتمسك في حد ولا هتطرد حد ..
اللي عاوز يمشي يتفضل واللي عاوز يقعد برضه يتفضل
هتوفر طاقتك في حاجات أهم بكتير زي مشاكل الأولاد وتربيتهم وطلباتهم اللي مش بتخلص
المصيف بالنسبالك يعني إستجمام وتأمل للبحر
هتدرك فعلاً أن الدنيا أوضة وصالة وأن لك أولويات أهم من أي حاجة من الهبل اللى بتشوفه
هتمشي سرحان والناس هتفكر أنك نفضت لهم مع أنك مشفتهمش أصلاً
بعد الأربعين هتكون في وادي وعالم الأندر إيدچ كله في وادي تاني خالص.
تحياتي لأبناء الأربعين