الحلقة ( ٤ ) مسلسل ( مكتوب عليا ) : ”الحبكة مظبوطة اوى”

نشرت صفحة النقادة يسرا حسام تعليقا علي الحلقة الرابعة لمسلسل مكتوب عليا قائلة :

الحلقة بتبدأ من بعد ما جلال انقذ البنك وبيروح بيسأل سلمي علي اسمها وبتضحك عليه وبتقوله فادية وبعد كدة بيروح للسيد صاحبه المحل اللى اشتغل فيه وبيقوله ميقلش لحد على الكتابة اللى على ايده وبيروح على بيته وبيقعد يفكر فيها وفى اسمها .

وبعد كدة بيقول لنفسه هو أنا ملزق وبيسهر وبيعمل لنفسه اربع كبايات شاي عشان يعرف ازاي بتحصل الكتابة دى وبيفضل صاحي طول الليل وعينه بتغمض لمدة 5 ثواني وبتحصل الكتابة وبتكون الكلمات الجديدة هى ( سيبها تقطع ) - ( سميحة القاتلة ) - ( حضن ) وبيطلع يقعد فى الصالة وأبوه بيجيله مكالمة من خالت جلال اللى بتطلب منه أن جلال يوصل رقية الزقازيق.

وبيروح لبيت خالته ياخد رقية من هناك عشان خاطر دكتور الدايت بتاعها عنوانه في الزقازيق وبيعدى علي البنك عشان يشوف سلمى فبيعرف ان اسمها الحقيقى سلمى مش فادية زى ما هى قلتله وهو ماشى بيخده فرد الأمن بالحضن وبتختفى كلمة حضن وبتفضل رقية طول الطريق تضايق فى جلال والعربية بتخلص بنزين وبتختفى كلمة سيبها تقطع.

وبيرجع جلال على بيته وبيفتحوا التلفزيون بيكون فى فزورة على جايزة 100 الف جنيه ومن ضمن الاختيارات كلمة سميحة القاتلة فاختار جلال سميحة القاتلة وبيبعت على البرنامج وبيكسب ال 100 الف جنيه وبينام وبيصحي يبص على يده .

الحلقه كانت كويسة والحبكة مظبوطة اوى وانا شايف أن هلا رشدي اللى هى جيجي حوارها قليل اوى و دى حاجة ضايقتني اوى خصوصاً أن ده اول دور ليها فى عالم التمثيل ومحتاجة فرصة
تقييم الحلقة : 8 / 10.

و متنسوش دلوقتي بقي في جروب نتكلم فيه و ننم علي مسلسلات رمضان براحتنا او نناقش المسلسلات اللي بنحبها و توقعتنا للاحداث سوا ' اللينك في اول كومنت '