خالتك أنوش تكتب..أنواع الموظفين وأنت وحظك

نوع يقل نوع يزيد، بس هي دي أنواع الموظفين اللي هتقابل منهم في أي شغل، وأنت وحظك بقى هتقع مع مين وفين، عشان كدة قلت أنورك وأكتبلك الأنواع اللي قابلتها واللي تعاملت معاهم، وأشهرهم طبعا العصفورة وده مش محتاج كلام لأنه طاير من مكتب لمكتب ومش هتعرف تمسكه..تعالوا نتعرف الباقي ودور أنت براحتك عليهم في الشغل:

1- المطبلاتي

لازم يكون أول واحد. بسبب شلوت سعادته اللي دفعه للأمام، يروح مدير ويبجي غيره، ويفضل المطبلاتي ثابت علي موقفه، بيمدح كحة المدير اللي كلها علم وتوعية. هو مش قريب المدير ولا من معارفه، كل الحكاية إنه موهوب وبيحب دايما يبقى مع الرصين مديره.

2- مسئول الفطار

من اسمه، ده اللي بيجمع الأوردر ويتصل ويطلب ويحاسب، كله كله. لو حد جاع في بيته بعد الشغل، بيتصل بيه يسأله على الأكل. أي حد عايز يفطر بيروح له. ده بقى لو في يوم غاب أو جاب أكل معاه.. مجاعة وضربت في الشركة كلها.

3- الزائر

بييجي الشغل عشان يزور صحابه، ماحدش عارف هو بيشتغل إيه؟! بس هو فرفوش قاعد مع دول شوية ومع دول شوية، نسكافيه مع ده وقهوه مع دي، تقولش جاي النادي يقضي وقت سعيد.. حاجة كده منتهى البجاحة

4- الرايق صاحب المزاج

هتلاقيه بيدندن وهو قاعد حتى لو صوته مش حلو عادي. لازم يكون مشغل أغاني علشان يعرف يشتغل، أو مايشتغلش بقى مش فارقة..المهم مزاجه يتظبط. فحسب المود تلاقيه بيسمع مرة مهرجانات، رومانسي موجود، إنجلش ماشي.

5- المتشائم

عم ضياء بتاع "كله رايح". شايف الدنيا كلها سواد في سواد. يملك طاقة سلبية جبارة تتصدر لأوروبا ويقبض مكانها باليورو، 5 دقايق معاه وتقطع شرايينك، أوعلى الأقل تفكر في طريقة انتحار لطيفة للويك إند.

6- صاحب السعادة..عن نفسي أتحدث

مش القائد أو الشخصية المهمة، لا إحنا نقصدها حرفيًا. ده الشخص اللي بينشر البهجة والسعادة في المكتب، علشان يقضي على روح المتشائم اللي فوق ده. ده اللي بيحلي طعم الأحزان ويعمل شعوذة في المكان. ادعي ربنا ده يكون موجود معاك في شغلك، علشان حرفيًا ده اللي هيصبرك على بلاوي كتير.

7- التلميذ النجيب

"نجيبه الخوالي" في الثلاثه يشتغلونها، قلبه على الشغل بزيادة..عامل زي صاحبك أيام المدرسة، اللي كان يقول للمدرس "مش هتدينا واجب يا أستاذ؟". ده اللي بييجي من أول دقيقة وشه في الدفاتر مش بيسيبها غير وهو قايم مروح. ده بعد ما يتحايلوا عليه علشان يروح ويقولك اتقي الله في أكل عيشك.

8- المستعجل

عكس التلميذ النجيب، اللي من أول ما يوصل يسأل هنمشي إمتى. ده بالنسباله الشغل عقبة في حياته بتأخره عن إنجازات تانية مهمة. إنجازات ماحدش يعرفها غيره. بس هو مستعجل وخلاص، وبيحسب الدقايق والثواني لحد ما يروح يشوف إنجازاته.

9- الحربابيه

ده النموذج الأمثل ليه هو الموظف "أبوالخير" في فيلم مراتي مدير عام، وده موافق معاكم ورافض معاكم وأي حاجة هو معاكم، تقدر تقول معكم معكم عليكم ورحمه عليكم