خالتك أنوش تكتب..أهم أم في عيد الأم
بمناسبة عيد الأم، فأهم أم في حياتك بعد اللي خلفتك هي حماتك، رضاها صعب؟!..لأ مستحيل، مع أن حماتي كانت ملاك بس يمكن عشان أنا أنوش، وشوف حكاية صحبتنا وحماتها في عيد الأم اللي فات عشان تستفاد للي جاي.
اسكتي ياريسة النهاردة عيد الام وجوزي مصمم اقول لأمه كل سنة وهي طيبة واجيبلها هدية كمان
طب وإيه المشكلة؟! زي مامتك يا بنتي..
- لا مش زي أمي ...السنة اللي قبل اللي فاتت جبتلها طقم كاسات بـ١٢٠ جنيه وعبايه فاسكوز
تقصدي فيزكوس يا أختي..
- فاس فيز ..كله قماش...المهم دخلت عليها وقولتلها كل سنة وأنتي طيبة واديتها الهدية قامت بصالي كدا وقايلة لي ..يا ما جاب الغراب لأمه مش دا المتر بتاعه القماش بـ٢٠ جنيه ..قولتها ٢٠ جنيه إيه يا حجة هو أنا جيبالك علبة بسكوت...طب قولي وأنا طيبة ولا كتر خيرك ..وخدت الحاجه رمتها ع الكرسي وضربت بوز..وأول ما جوزي جه بالليل اشتكت له ...وكان نفس موال السنة اللي فاتت ..قولت مش هكرر الموضوع ده ..والسنة اللي بعدهاحطيت ٥٠٠ جنيه في ظرف حلو وكارت بيضرب موسيقي وقولتلها كل سنة وأنتي طيبة ..وبوستها واديتها الظرف..راحت بصالي بصة ماري منيب في حماتي قنبله زرية بالظبط . وقايلة لي ...قلة زوق ...هو أنا شحاتة بتديني فلوس ...ونفس القصة والله..اشتكت لجوزي ...واتكرر نفس السيناريو بحذافيره وتدابيره .. السنة دي قلت في عقلي ما عنديش استعداد يتكرر الوضع دا تاني خلاص.
قولتلها طالما جوزك عارف طبعها خليه هو يجيب الهدية ويقول لها هو اللي جايبها ...جايز مثلا متضايقة منك أنتي.
راحت اتصلت بيه وشاورته في فكرتي العبقرية، وبعد ساعتين لقيتها داخلة عليا وبتقولي شورتك هباب ياريسة..أنا اتصدمت من الهباب اللي طاير من بقها، وقبل ما أسألها قالتلي، أمه عايزاه يتجوز تاني عشان يجيب الواد، هي مش عارفة أن الواد والبنت من الراجل مش مننا يا ستات، حاولت أهديها وأقولها معلش كدة المفروض أنتي اللي تروحي تجيبي هدية وتحاولي تحسني علاقتك بيها، بدل ما تزن على جوزك..وبعد ما جت من عند حماتها تاني دخلت وقالت والدمعة هتفر من عنيها، حماتي أول ما شافت الخاتم..قلبته يمين وشمال وحدفته في الهوا مرتين تلاتة، ولسة هتقولي الخاتم خفيف، شقطته الخاتم من الهوا وقومت روحت وأنا مقررة أنها مش هتشوف وشي تاني خصوصا في عيد الأم.
