خالتك أنوش تكتب..”بلاش تعكر اللبن”
أيوة زي ما بقولك كدا
في ناس متخصصة في تعكير اللبن ترش عليه ملح قبل ما تقدمه
تعال اقولكم ازاي !
لما أب يجيب لأولاده لبس أو أي حاجة غالية ولا رخيصة؛ يفضل يقولهم أنتوا عارفين "أنا دافع دم قلبي علشان اجيبلكم الحاجات دي يارب يطمر فيكم" هيطمر ياحبيبي إن شاءالله بس بلاش دبش.
لما أم تتعب في الأكل وهي بتقدمه تقول "طلع عنيا وأنا بعمل واتبهدلت يكش يطمر" هيطمر بس من غير دبش
لو دخلت ابنك جامعة خاصة، ترجع تقوله "عشان أنت فاشل..أنا عملت كدا" سايق عليك النبي كنت سبتني فاشل وبلاش تسمم بدني
والأهم لما زوج يخرج مع مراته.. خروجة حلوة وهو راجع يقولها "يلا مكنتش عايز اخرج بس مش مشكلة خرجت علشان منكدش عليكي" ينكد عليك وعلي عمرك ما أنت نكدت..
لما صاحب يقف مع صاحبه في أزمة ويقعد بعد كدا يقوله دا أنا اتعذبت من وقفة المستشفي والمشاوير والبرد بس مش مهم يا صاحبي كله علشانك..عشاني! ياريت عشاني تسكت وكفايه ذل…
جمل تبان عادية بس هي بالظبط زي ما تكون تعبت وقدمت كوبايه لبن جميلة لحد وفي الاخر رشيت ملح علي الوش، فمش عارف يستمتع باللبن اللي أنت قدمته له، ولا يدلقوا ع الأرض.
لو هنعمل حاجات حلوة للي بيحبونا، يبقى نكملها للأخر بمحبة ورضا ومن القلب
