خالتك أنوش تكتب.. أنا حبيت سن الأربعين!!

أنا حبيت سن الأربعين

وبقيت زي ماتقول كد أربعينية وأفتخر

لأني أصلا طول عمري ست مسنة بس من غير حجة، باستمرار ظهري وركبي واجعني..الحاجات اللي بقولكم عنها دي كانت موجوده معايا من العشرينات بس كنت بشتكي

منها علي استحياء دلوقتي أقدر أواجه المجتمع وأقولها بقلب جامد.

خد عندك الحاجات اللي كنت بخاف أقولها ولا اعملها قبل الأربعين

- دلوقتي أقدر مردش علي التليفون عادي! ست كبيرة وكده، يمكن ماسمعتش، مشفتش، مفهمتش، مفتكرتش ..أقولك..نسيت !

- أني فهمي محدود في حاجات معدودة في التكنولوجيا، دي حاجات جديدة وغريبة وأنا أصلًا مش من هنا! ده شيء مالوش أي علاقة بمستوي ذكائي المعدوم أصلًا!

-زي أني ممكن اقول جمل هبلة، او أراء تافهة، أو لفظ غير لائق وبيدوني عذري ويقولو "الست كبرت وماتاخدوش علي كلامها وكد!".

- زي أني علي طول عايزه أنام ومكسرة جدا ده السن ياخوانا! ..فيها ايه؟ بحتاج أريح كتيرررر عشان في سن الأربعين.

-زي أني مقدرش علي الخروجات والتنطيط واعتذر عن الخروجات طول الوقت عادي العضمة كبرت يا ناس! مش أنتخة ولا قلة ذوق ولا حاجة لقد هرمت.

- زي أني أكل بمزاجي و ٱنسى حوار الرجيم؛ التخين بيموت والرفيع بيموت..

- زي أني أتعصب علي الموظفين ولما يشتكو يرد عليهم مديري ويقولهم " حكم السن معاها عذرها..كانت في شبابها كيوت..آه والله.

- زي أني لا انتظر أحد علي الأكل لما يتاخر، أنا صاحبة مرض وبأخذ علاج يا جدعان.

- زي أني اما ابقي في أي مكان اقدر اطلع كيس العلاج قدام الناس كلها من غير كسوف..حكم الأربعين أصلي صاحبت مرض

-زي أني أفرد وأمدد رجلي في ممر القطر بدون حرج وأركب في الكرسي اللي قدام وقول معلش يابني صاحبه مرض.

-غير أن كل اسبوع لازم أخذ حقنة الأعصاب بحكم السن أهم حاجه أعصابي يا ابني

وأكتشفت في الأربعين إن قعدتي في سريري مع موبايلي وقهوتي أجدع من أجدع خروجة

والله..أنا أصلا طول عمري دلوعة وماليش في الممرطة وكنت مكسوفة أقول اللي قولته في الثلاثين، لكن دلوقتي ورقي سليم و دخلت الاربعين.

انتظروني بعد ست سنين ومذكرات امرأة علي مشارف الخمسين لو في عمري ست سنين بعد النهاردة.