خالتك أنوش..صورة واقعية من أول الثانوية
الحدثبمناسبة الامتحانات قولت أنقلكم صورة واقعية مع بنتي في أول الثانوية، ومناهدتي ومناكفتها، والزفت الموبايل اللي مش بيفارق إيدها.
- أنا مش قُلتلك مليون مرة تبطلي لعب على الزفت الموبايل؟
= والله مش فاكرة يا ماما
- وكمان هتكذبي؟ مش فاكرة إيه أنا لساني أدلدل
= مش بعد وراكي يا ماما، أنتي طول النهار بتقولي.. بس أوعدك هعِد من النهاردة وهبطل لعب قبل ما نوصل للمرة الـ ١٠٠..ه مبسوطه مني؟
- كفاية استهبال وبطلي لعب بالزفت عشان بيوجع عينيكي، وعندنا مذاكرة يافاشلة..يا فاشلة (بغير نغمة صوتي وبرضه مش بتتهز).
= يا ماما بأكل جزر كتير، فعيني مش هتوجعني، وهطمنك أنا بذاكر قبل الامتحان
- لا هتوجعك يا روح ماما .
= بس انتي دايمًا بتقولي الجزر بيقوي النظر، وانا باكل جزر قبل ما ألعب، وأصحابي بتبعت الملازم وبعدين متخافيش من يوم كورونا واحنا بننجح
- (يامولانا تولانا) لا طبعًا ده كلام مش صح.
= يعني الموبايل مش بيبوظ العين؟
- لا الجزر هيعمل ايه في مسكتك الموبيل في الضلمة، ولا في مذاكرتك اللي سايباها
= طب ياعسل بطلي تزعقي وانا أمسكه في النور!!
- يا ريت تدوري علي مصلحتك وتذاكري شويه اسمعي كلامي
= تاني يا ماما تاني...مصلحتي أنا عارفاها..أخر أسبوعين بأخذ الخلاصة وبنجح الحمد لله
- ارحميني وأسمعي كلامي.. أنت عديت الأربعين!!
= حياتي كلها ماشية علي توجيهاتك وكل يوم بتعلم منك يا أربعينية ومفترية.
- فين العلام ده بقىْ؟!!
- اتعلمت منك الصبر!؟
أفكر في خيالي طيب استني بس لما أبوكي يرجع البيت وأنتي تشوفي، ولا اسيبها لما تقع ورقبتها تنكسر تتعدل، ولا يمكن بكرة تكبر وتتجوز وتخلف عيال يطلعوا عنيها بالضبط زي ما بتعمل فيا، ولا أخليني حكيمة وأقولها لما تكبري وتبقي قدي هتفهمي أنا عملت كده ليه، واتنمر عليها وأقولها إحنا لاقيينك علي باب الجامع.
بس بلاقي نفسي في الأخر بقولها: عارفه يا بنتي أنا كنت الوحيدة عند جدك اللي ليها صوت وبصمة..
= ترد بلماضة تطلعني من حالة الحنين للماضي اللي كنت هخش فيها: بيقولوا اكفي القدرة علي فمها تطلع البت لأمها
-لا يا فاشلة الجديد "اكفي القدرة علي فمها يدلق الفول منها".
جيل ما يعلم بيه غير ربنا..صبرنا وإياكم.