خالتك أنوش تكتب..ممكن آخد وقت حضرتك؟!

- مساء الخير يا فندم معاكي مريم من شركة أنور مصر للتسويق العقاري، وعايزينك تشتري معانا.

= معاكم فين يا مريم؟

- في عقارات شركتنا يا فندم.. ممكن آخد من وقت حضرتك خمس دقايق؟

= لأ.

- تمام، شركتنا بتقدم عرض مميز لفترة محدودة عشان حضرتك عميله مميزه..

= لا شكرًا يامريم وأنا مش عميله مميزه وله حاجه

- بصي يافندم. أنا جاية أقدم لك عرض آآ...

= والله يا مريم انا ماليش في العروض ديه والعرض الوحيد اللي عايزك تقدميهولي هو تمسحي رقمي!

- يافندم أسمعيني بس. عندي ليك عرض، لسة حالا نازل خصم على القصور بمقدم يبدأ من 7 مليون جنيه بس، وتقسيط على 20 سنة ، وبنصحك تأخدي واحد.

= الله يسامحك يامريم؟!!

- القصور ديه متشطبه سوبر لوكس ومكانه هادي جدا وهيعجبك

= لا شكرا، عندي.

- عندك قصور؟!

= آه..عندي قصور في الشريان التاجي.

- تاجي حضرتك في أي وقت، تشرفينا وتعاينى بنفسك، وبالمرة تشوفي الموقع علي طبيعة، لازم حضرتك تشوفي عاملين ايه؟!

= عاملين إيه؟!

- كويسين الحمد لله، وحضرتك؟

= حضرتي عايزة تقفل والنبي يا مريم.

- هتقفلي قبل ما تسمعي عرض الشقق؟

- كفاية القصور، مش عايز اسمع.

- تمام هقولك.. الشقه دوبلكس 200م بتبدأ بمقدم 2 مليون جنيه بس، وقسط على 15 سنة وعايزينك تاخدي فيهم؟

= ممكن يا مريم تقفلي؟

- ليه يافندم؟!

= عشان لو 200 جنيه اللي في جيبي سمعتك هتعيط..أنا زاهده

- وأنا مريم فرصة سعيدة..

= مش سعيدة خالص.

- يافندم أنا عايزة مصلحتك

= يابنتي أنا مش مش عايز قصور ولا شقق.. مش عايزة حاجة من متع الدنيا يلا حسن الختام.

- تصدقي طلبك عندي! إيه رأيك عندنا مقابر تشطيب سوبر لوكس؟

= والله أنا خايفه اتكلم معاكي أكتر من كدا، يطلع عندك مكان في العالم الاخر.

- أسفة يافندم لسه مالناش فروع هناك

= تمام لما تفتحوا فروع في جهنم وبئس المصير عرفيني عشان آخد فيها

- بس حضرتك ان شاء الله تكوني من أهل الجنه ومش من أهل النار

= لأ بنسبة كبيرة هدخلها، لإنك لو ما قفلتيش يا مريم دلوقتي، هفجر نفسي فيكي.

- حلو.. عندنا عرض لسة نازل حالا ع القنابل، تحب تسمعيها....