خالتك أنوش تكتب..شوية حاجات لازم كل ست تكون حفظاها
شويه حاجات لازم كل ست تكون حفظاها علشان تقدر تتعامل مع زوجها وتعيش حياة سعيدة وهادية.
١- ناكل ايه بكرة!!؟ في اللحظة دي الدنيا بتسود قدام الراجل وبيبدأ يدخل في حالة اكتئاب وبداية تخلف عقلي.. ويبدأ يفتكر الأسئلة التعجيزية في امتحانات الشفوي بتاع زمان .. هو بياكل أي حاجة في أي وقت.. السؤال ده تسأليه بينك وبين نفسك وبصوت واطي وتعملي أي حاجة وهو بياكل أي حاجه بمنتهى السعادة. وهناك مكان محجوز في الجحيم للائي يسألن أزواجهن هنأكل إيه بكرة..اسمعي مني.
٢- الحواس ٥ .. عند الراجل مابيشتغلوش مع بعض.. وأعطالهم كتير.. ومعظمهم شغال باتنين منهم بس.. حاسة التذوق وحاسة اللمس.. أما بقى انك غيرتي نوع البيرفيوم أو غيرتي قصة شعرك أو غيرتي نفسك حتى.. كل دي شكليات. أنك نضفتي الشقة أو غيرتي مكان الأنتريه أو مكان السجادة.. هو مش عارف ولا فاكر أماكن الحاجات دي أصلا!!.. لو مكان التلاجة أتغير بس هياخد باله غير كد توتو .
٣- لما تلاقيه قاعد سرحان.. مش لازم يبقى بيفكر في واحدة تانية!.. هما بيسرحوا في اللاشئ.. .. بيفضوا دماغهم.
٤- كلهم بلا استثناء عندهم زهايمر وخصوصا في الطلبات يعني لو عايزة طلبات فمش كفاية تقوليله هات كذا وانت جاي.. لا.. لازم تبعتيله رسالة على كل برامج التواصل علشان يفتكر.. وتبعتيله تاني وهو راجع من الشغل.. ولو تقدري بنظارة مكبرة أو بندقية قناصة تحددي الوقت اللي هيعدي فيه جنب السوبر ماركت وتقتليه قصدي وتكلميه يبقى زي الفل.
٥- لما تحبيه يغيرلك لمبة أو يتصل بالسباك.. مش لازم كل أسبوع تقعدي تزني عليه.. في التأني السلامة والصبر مفتاح الفرج او هاتي أنتي فرج يصلح الحاجة.
٦- الكسل دي صفة وراثية سائدة في الصنف كله.
٧- الرجالة نوعين بغض النظر عن أخلاقهم ومستواهم الثقافي نوع بيحب الأكل ونوع بيحب حاجة تانية.
٨- الفانلة الداخلية في البيت مش عفانة.. ده الزي الرسمي للرجالة.. لو متضايقة هاتيله فانلات قطونيل ملونة. ٩- اختاري الوقت المناسب للمناقشات.. يعني مش وهو راجع تعبان من الشغل.. ولا وهو بياكل فتسدي نفسه.. ولا قبل النوم فينام متنكد.. ولا أول ما يصحى قيقوم متعكنن.. مش عارفة امتى الحقيقة!! ١٠- لو عندك راجل بيتكلم ويسمع (الإتنين) ده تحافظي عليه وإوعي تقولي لحد أنه بيتكلم ويسمع.. الحاجات دي بتتنظر.. دي فصيلة نادرة زي الديناصورات وهيعملولهم محمية طبيعية قريب.
١١- لو بيساعد بقى في البيت وبيقلع جزمته برة ويعلق هدومه ويعمل شاي ومبتسم وبيقول كلام حلو وبيلبيلك طلباتك وبيفسحك.. خاااافي !!.. ده غالبا عفريت أو كائن فضائي.. علشان النوعية دي انقرضت..
