خالتك أنوش تكتب..مع دخول الفلانتين أعاده الله بالخير واليمن

مع دخول الفلانتين أعاده الله بالخير واليمن والبركات
مش عارفة ليه متحمسين للاحتفال بعيد الحب وأحنا نقدر نخلى كل أيامنا حب
تعالي أقولك إزاي
لما تلاقي أن علاقتك مع جوزك بقت مضطربة و مليانة مشاكل..
او إنك حاسة أنه بيبعد وأنك مبقتيش من أولوياته..

و قبل متجري علي الكوافير تقصي شعرك و تضربيه الأحمرالعنابي أو الأصفر الفاقع.. زي ما صاحبتك نصحتك..

أو تروحي الجيم و تمشي عل دايت اللي ينزل خماشر كيلو في الأسبوع...
"طبعا دول مشوارين مهمين مقدرش اعترض" بس في حاجة اهم لازم نعرفها كلنا..

خدي بالك مش لازم يبقي سبب نفور الزوج أن الزوجة مقصرة في حقه... لا بالعكس
ساعات تضحية الزوجة المفرطة و استمواتها إنها ترضيه بيبقوا السبب..

ساعات الزوج بيطفش لما بيحس أن مراته معندهاش حاجة غيره في حياتها... مفيش اهتمامات عندها غير هياكل إيه و هيلبس إيه و هيقعد معايا وقت إيه؟!!..

ساعتها بس بيحس إنها مملة..فاضية.. مفيهاش جديد.. مواضيعها مكررة..
ساعتها بس بيبدأ يدور علي حاجة جديدة.. مثيرة.. عندها جديد تحكيه..
أنا مقلتش أنه هيدور علي واحدة تشاركه اهتماماته...لا هو هيدور علي واحدة يشاركها اهتماماتها... و توريله دنيا جديدة..

طيب أنتي عارفة أن كل اخصائين الاستشارات الزوجية بيدينوا تضحية الزوجة عشان عارفين أن أغلب الرجالة بيعتبروا تضحية الست؛ غباء و ضعف..
أنتي عارفة أن دينك مقالش إنك تضحي بحقوقك.. آيا أن كانت عشان آي حد..لا زوج و لا أولاد..
عارفة أن الراجل بيحب الست المستقلة فكريا و اللي عارفة حقوقها و بتحافظ عليها حتي لو أظهر العكس..
عايزة منه اهتمام... اهتمي انتي بنفسك..

عايزاة يحبك..حبي انتي نفسك...

عايزاه يحترمك... احترمي حقوقك وأنوثتك واحتياجاتك، فرفشي كدة وبطلي تخنقي الرجالة وقومي اعملي محشي عندنا فلانتين كمان يومين.