خالتك أنوش تكتب ..أنا وأمي وإسكندرية والخيار
من ذكرياتي الحلوه مع أمي .. لما كنت انزل معاها زمان السوق نجيب حاجات البيت وتقف قصاد البياع تفاصل معاه لحد ما تجيب أخره أمي الله يديها الصحة زمان على بلاچ في العجمي كان الراجل اللي بيلف بنطلونات ونضارات وكور بلاستيك معدي ندهت عليه سألته على سعر البنطلون..
- بصي يا حجة.. عشان هنستفتح وعشان خاطر حضرتك ده بـ..أربعين جنيه طبعا الراجل صعب عليا جدا.. وقلت أمي بقى هتفاصله وتأخدها منه بخمسة وثلاثين بعد ما تطلع روحه.. لكن ما عملتش كدة خالص.. بكل ابتسامة وهدوء وثقة قالت له : -هم خمستاشرجنيه أنا قلت دي قصدها أكيد علي نضارة أو إيجار الشمسية أكيد حاجة منهم.. طلعت بتتكلم عن البنطلون.. وفجأة الرجل بص لينا بصة كلها بؤس لمدة دقايق بدون حرف أو صوت كانت كفيلة بإني أقوم اسنده قبل ما يطب ساكت قصاد الشمسية و نقعد نفوق فيه او نضطر نسحبه بعيد وشغلانة.
وبعدين قلت بس... ده ساكت عشان بيستجمع كل الشتائم اللي حفظها من يوم ما اتولد وهيشتمني أنا وأمي بيها حالا.. وابتدينا أنا وأخواتي نغمز أمي في رجلها بمعنى أديله خمسه وعشرين جنيه قبل ما يفرقع فينا... هيسيبك انتي ويضربني أنا وإخوتي بعصاية الشمسية.. وأمي صامدة صمود محمود المليجي في فيلم الأرض الصدمة الحقيقية لما اتكلم.. وقال - طب خليهم سبعتاشر جني يا حجة خر الجميع صرعى تحت اقدام امي... سبعتاشر؟؟؟ ده انت طلعت عبيط قوي وأمي ناصحة... طبعا بمنتهي النصر رفعت عينها في اللحظة دي.. - خمستاشر جنيه كنت هتجنن... هتشل... هموت اعرف هيقولك إيه البياع ابتدى يفقد القدرة على تحريك أطرافه ونزل بركبته في الرمل وحط الاستاند اللي شايله جنبه - طب خليهم ياحجة ستاشر أنا ابتديت اسخن وهقوم اضربه.. إزاي يا سافل ترضخ؟؟ ده انا كنت خلاص أنا واخواتي بنجمعلك العشرين جنيه الفرق وهتبرعلك بيهم من كتر ما صعبت علينا يا زبالة... أمي بنفس ذات نفس الثقة اللي أسقطت البياع على ركبه..قالت: هديك سبعتاشر جنيه وهاخد نضارة مع البنطلون إيه؟! "بصوت شفيق" أنا انبهرت من الرد زي ما انبهرت من متابعة البياع وهو بيطلع البنطلون والنضارة وبياخد السبعتاشر جنيه وبيقوم يمشي وبيغيب عن الانظار وهو رافع الاستاند... ومن يومها لحد النهاردة عمري ما قلت لأمي علي سعر أي حاجه أنا اشترتها ولو حصل بخصم النص.
وفي يوم جميل قالت لي انزلي هاتي لينا خيار ونزلت ، ماهي أمي ولازم اسمع كلامها ورجعت البيت اتفضلي الخيار قولت في نفسي لو قلت إنه ب 2جنيه هتهزق قولت لها بجنيه..قالت: اتفضلي رجعيه، طب ليه ماله ؟ ماهو زي الفل _قولت لك وحش وغالي قعدت علي السلم اللي طالع واللي نازل ادي له خياره وعشان أنا مرزقة جات جارتنا تشوف أمي باليل وقالت لها إن ابنها طلع ليها بخيارة وقال لها إنها من عندنا . أمي بصلتي اوووي قولت لها مش فلوسك رجعتلك مالكيش دعوة انا وزعت الكيلو زكاة عن صحتي.. قالتلي بنفس ذات اللحظة زكاة عن إيه ؟ ماقدرتش أقاوم كتير لما افتكرت جبروتها مع الراجل بتاع الاسكندرية فانهرت ونزلت زيه على ركبتي ابوس إيديها تسامحني بدلا ما تسألني وتقررني عن التمن الحقيقي للخيار وتدفعني الجنيه التاني! الست دي أمي.
