خالتك أنوش تكتب..الدايت الإسلامي هو الحل عند الأنثى

بما أن الشتا خلص وبدأ الكلام يدور عن الدايت وإزاي هنخس بعد جرايم الشتا اللي ارتكبناها في حق معدتنا وأردافنا وأكتافنا على مدار 3 شهور من الأكل بدافع الدفا مش لا قدر الله بدافع الجوع، فهحكي عن مراحل الدايت العادي عند الأنثى، عشان تعرفوا ليه الدايت الإسلامي أفضل وأقرب للتقوى.

1- الاستعداد..تشترى عيش أسمر و جبنة قريش وسكر دايت و10علب تونة علي 5 كيلو تفاح.

2-الإعلان..تقول لكل الناس إنها عاملة دايت، كل الناس..عامل السوبر ماركت، مسئول الفطار في الشغل، لو محصل الكهرباء قابلها هتقوله إنها عاملة دايت.

3-التشجيع..تحاول تقنع أصحابها وأخواتها و قرايبها يعملوا معها علشان نشجع بعض

4-التجهيز..تنزل أنظمة دايت من على النت، وكام مشروب بيزود الحرق، وتزود عليهم شوية تمارين تشد البطن.

5-التنفيذ..(الفطار) جبنة قريش مع ربع رغيف أسمر+ (الغداء) علبة تونة + (العشا) فاكهة وزبادى، وفي نص الليل وتحديدًا عند الساعة 12 باليل كيلو بلح الشام بالقشطة و بيتزا مشكل و لتر بيبسي دايت.

6-الشعور بالذنب..أنا إيه اللى عاملته ده يا خسارة اليوم، أكيد رودي وسوسو محافظين على الدايت ومعملوش زيّ.

7-حب النفس..أنا يعنى هحرم نفسي ليه الدنيا قصيرة و محدش هياخد حاجة مش مهم الشكل أهم حاجة القلب.

8-عوامل محفزة..تفتح التليفزيون و هى بتشرب هوت شوكليت تحبس بيها تلاقى فيديو كليب لهيفا وهبى فتقرر انها مش أقل منها و لازم توصل لنفس رشاقتها.

9-النية..تجدد النية أنها هتبدأ دايت من بكرة و كلها عزيمة و إصرار بس بقى تاكل النهارده اللى نفسها فيه علشان متبوظتش تانى بكرة، فتقوم قبل الفجر تقلى بتنجان و تحدق بفلفل اخضر و2 كيلو بطاطس محمرة و ساندوتشين جبنة رومى سخنة.

10- الإغماء..تمر ببدايات أزمة قلبية والحمد لله تنجوا منها فتقرر عدم تكرار هذا مرة اخرى .

وتبدي تقول مفيش حل غير الرجيم الإسلامي أنا أكل وأمة لا الله الا الله تدعيلي أخس. وبكدة تكون كملت خطوات الدايت اللي عمركم يارجالة ما هتعرفوها.

نسيت اقولكم إن الرفيع هيموت والتخين هيموت.