خالتك أنوش تكتب..تعالي ياست سعاد عاوزاكي عشان رمضان

دلوقتي أحنا دخلين علي شهر رمضان ولسة المدارس والدروس مستمرة والكحك والبسكوت يا ست سعاد اللي ف نص رمضان ولبس العيد اللي أخر رمضان والكهربا والإيجار والغاز والصيانة والباقات والمواصلات بتاعة كل شهر..حاجات كتير..كتير..بجد كتيير.

وللأسف أحنا مش وارثين تركة جدو الثامن عشر. دول كام مليم اللى بنقبضهم كل شهر ياسعاد

إسمعي مني بقا يابنت الحلال، أحنا مالناش حيلة في الرزق.

بلاش ترهقي نفسك بمصاريف رمضان..بلاش كماليات رمضان..بلاش طقم الخشاف وبلاش حلل جديدة وبلاش بقى زينة رمضان ولا مفرش الأنتريه والسفرة اللي بعشروميت جنيه القديم بتاعك يمشي الحال ولو مفيش مش مهم.

بلاش تبصي لغيرك طبخ إيه في رمضان..بلاش نتابع جروبات الأكل في الشهر ده، رمضان للعبادة..بلاش عزومات والبط أبو 300 جنيه وورق العنب أبو 50 جنيه.

و الكنافة مش هتعيط يعني لو محشتيهاش لوز وجوز ومانجه، ده شهر عبادة وتقشف-السنة دي بس- وأوعي تجيبي سيرة الفانوس يالوزة أبو 300 جنيه اللي أخوكي جابه لمراته ملناش دعوة

وعين الجمل مش هيغير لون عنيكي يعني..البلح فيه فوايد أكتر منه علي قد الإيد.

سعاد يابنت الناس لحمتك، بانيهك، خضارك، سمكك، غداكي، عشاكي هو هو بتاع كل شهر بس غيرنا المسمي فطار وسحور وشيلنا وجبة ساندوتشات المدرسة مش كده ولا إيه!؟

أيوة شايفاكي وعارفة أنك مش بتعملي كدة، آه وسمعاكي بتشتمي في الأسعار والتجار وأوكرانيا والاقتصاد واللي خطط للدولار..أيوة هما بس هنعمل إيه لازم نتصرف مش هنعيط.

نيجي بقا لنص رمضان حكايه إنك تعملي 10 كيلو كحك و10 بسكويت..تنسيها خالص خالص كفايه كيلو كحك وكيلو بسكوت للعيال علشان هتتخني وتقلبظي ومش هنعرف نخسسك يا سعاد ولا حتى الرجيم الإسلامي هينفعك ده رمضان..

أخر رمضان نزلي الصيفي وطلعي الشتوي منها رياضة ومنها تشوفي عندك إيه مستخبي تكملي عليه للولاد علشان لبس العيد.

كدة رمضان خلص وربنا يجعل كل أيامكم أعياد وأرزاقكم كلها بركة، وكل عام وأنتم بخير.