خالتك أنوش تكتب .. ”ابلكيشن حماية الولاية”

فكرت في ابلكيشن عظيم، طول الليل بمخمخ في الفكرة وارتب فيها .
الابلكيشن هنسميه " انجد الوليه من العالم المفترية" ..وفكرته زي اوبر كده .
أي ست جوزها هيضربها أو يتعدي عليها هتستخدم الابلكيشن ده وتبعت اللوكيشن بتاعها فتوصلها في اسرع وقت عربية نص نقل فيها ستات شبه ريا وسكينة كده ويطلعوا يكتفوا جوزها ويضربوه علقة موت قبل ميتكلموا اساسا معاه أو معاها .. بعد مايضربوه نشوف الموضوع .
نفترض أننا اكتشفنا مثلا أنها كدابة ومحدش ضربها هنخاصمها وهنزعل منها جامد وهنديها تقييم وحش مثلا نجمة واحده عشان متكررهاش تاني مش عشان الراجل لا عشان اللي بيكدب بيروح النار واحنا بنحب كل البنات ومش عايزينهم يدخلوا النار .
وهيكون ف امكانية أنك لو عرفتي أن ف المحيط بتاع بيتك عروسة جديدة اتجوزت ف بيت عيلة برضو نبعت اللوكيشن بتاع البيت ده وهيوصل فورآ بلدوزر يهد البيت ع اللي فيه عشان العروسة ديه هتصدعنا كل يوم ياحماتي قالت يا سلفتي عادت فأحنا نخلص قبل وجع الدماغ بدري بدري وهيكون في امكانية ضرب أي حد يزعلها او يقهرها ف الشغل تبعت اللوكشن نبعت أحنا علي طول الصحة والضريب ومباحث الاموال العامة، والامكانية دي بالتحديد أنا معجبة بيها اوي .
ولو أي بنت صممت ع عريس سئ ووحش واهلها رافضين وهيا لسه مصمم برضو وبتتغاضي عن كل العلامات اللي ربنا بيبعتها فأهلها يتصلوا بيا أنا بقي شخصيا واعملها علامة في وشها عشان الواحد أعصابه تعبت ومحاكم الاسرة أتملت من كتر الجوزات الفاشلة بتاعت بحبه وبكره يتصلح حاله.
اتمني يكون مشروعي حاز اعجابكو ولو حد عنده مقترح ياريت يقدمه وهناخده في عين الاعتبار.