خالتك أنوش تكتب.. كحك بالريد فيلفيت

وبعد ما اهل البر والتقوي ساهموا... وبعد شهر كامل من الاعلانات في التليفزيون لمؤسسة اتبرع من اجل الكنافة بالمانجا.. وكنافه بالنيوتلا والكنافه المدلعة وعرض سوبر ثلات رمضان قرب يخلص.. ودخلنا علي الكحك..
اللهم لك الحمد كحك بقي مناقيش..وصاجات محشي ملبن محشي عين جمل ماشي. سادة وبالسكر.. هاه.. يلا.. لله الامر من قبل ومن بعد.. بسيطة بعد علقة الكنافة بالمانجا. والقطايف هو بس الطابور ده يخلص وانا هشتري
- مساء الخير يا فندم
- هاه؟! مساء النور..
- كل سنة وحضرتك طيب.. امري
- وانت طيب.. عاوز كحك بقي كحك..
- انت تأمري يا فندم ...
- الاول كده كيلو الكحك بكام ؟؟
- الكيلو ب130 سادة.. و ب170 محشي
- جاك حش وسطك...!!!! لييييه ؟؟! ده كحك سادة!!!
- يا فندم الكحك اللي بالريد فيلفيت اسعاره كدة
- مالك ؟!!
-.... ا!!!
- ايه اللي بتقوله ده ؟؟ اللهم أني صائم..
- يااا فندم كحك.. بالريد فيلفيت
- انا مش عاوزة هاف ديفندر مانشستر معايا.. عاوزة كحك أنا..!!!
- يا فندم هو الكحك نفسه معمول بالريد فيلفيت..
- ليه ؟؟ للدرجة دي الحشرات مبهدلة المحل ؟؟!
-..
- اللي يخليكم تستخدمو "ريد".. و "فليت".. يعني مش مكفيكم مبيد واحد.. ايه ده ؟؟
- ياااا فندم ريد و فليت ايه بس.. يا فندم ريد فيلفيت.. مش فليت خالص.. مقولتش فليت انا..!!!
- ايه الهباب ده طيب ؟؟!
- يا فندم ده نوع جديد من الاضافات علي الكحك احنا بس اللي بننفرد بيه..
- بس انا مش عايزة انفرد
- اهو.. اهو يا فندم.. اللي في الفاترينة ده اسمه كحك بالريد فيلفيت...
- الاحمر ده. كحك ؟؟!
- ايوة يا فندم. كحك بالريد فيلفيت.
- يا ابني ده جاتوه!!
- كحك يا فندم... بالريد فيلفيت.. لا انا لازم ارجع لأمي في الحوار ده حاكم أمي مالهش في البدع دي
فين أيام زمان كان زي دلوقتي بعد الفطار نروح نشتري الدقيق والسكر وكل مقادير الكحك والبسكويت
وبعد الفطار في بيت العيلة الكل متجمع جيران وقرايب ونبتدي العمايل والعجين في (الطشت الكبير)
ونحضر (الطبلية) نثبت عليها ماكينة البسكويت والسكاكين الخاصه بيها عشان تغير في اشكال البسكوت
عجين الكحك والقالب بتاعه اللي بيطلع اشكال ايه ، وننزل انا وولاد الجيران نروح الفرن نجيب (الصاجات )
ونرجع نبتدي نغسلها ونمسحها وبعد كده ندهن سمنة فيها عشان العجين ميلزقش يجوا الكبار بتوعنا وامهاتنا اللي كانوا دايما مجمعنا يبدوأ الشغل واحنا حواليهم مبسوطين باللمة وفرحانين بقدوم العيد
وكل واحد فينا يجرب ويساعد معاهم اللي يلف ماكينة البسكوت واللي يرص العجين في الصاج لحظات كلها فرح وسعادة ونقعد نقلهم اعملوا الحرف بتاعي بالعجين ونتخانق مين الحرف بتاعه الاول ، وبعد مايخلصوا نجيب (طباشير) وكل البيت طبعا عامل فتك كل واحد يكتب اسمه علي الصاج عشان لما يخرج من الفرن ميتلغبطش ونقعد نهزر وكل واحد في الزحمة يحاول يدخل حاجته الاول ، ونشيل الصاجات كلنا ونمشي سوا في الحارة لحد الفرن تلاقي ريحه البيوت كلها كحك وبسكويت وولاد المنطقة كلهم شايلين وقاعدين قصاد الفرن عشان الحاجه تكون استوت
وبعد ماتطلع من الفرن تجيب كراتين تحط فيها الكحك لوحده والبسكويت لوحده كنت تفضل قاعد قصاد الفرن للساعه ٢ او ٣
حقيقي كانت ايام حلوه الواحد لو مكنش عاشها كان فاته كتير
الطيبه والزمن الجميل والبساطة في كل حاجه احنا عايشين ايام مش شبهنا ولا بتاعتنا ؛ والله ربنا يرحم كل اللي مات اللي كانوا دايما مجمعنا وعيشنا معاهم احلي ايام