الرأي

خالتك أنوش تكتب..روعة البدايات

الحدث

لما تتعرف على حد جديد لازم كده تاخد شوية إحتياطات علشان تحافظ على نفسك من أى صدمات
1 ???? تحط فى ودانك فلتر 7 مراحل و أوعى تسترخص و تجيب ال 5 مراحل علشان ده اللى هيفلتر الكلام الكتييييييير اللى بيتقال فى أول أى علاقة يعنى لو الطرف اللى معاك هيقول 100 كلمة حلوة هيوصلوا جوه ودانك كلمتين والكلمتين هيكونوا دول اللي فيهم الفايده

2 ???? جنزير بقفل اللى هو بيمسك العجلة فى العمود ده علشان متتسرقش إنت بقى تجيبه و تربط بيه رجلك فى حديد البلكونة علشان لما تتكلم مع الطرف التانى أوعى تصدق بسهولة و تطير فوق السحاب بكل كلمة بتتقالك عشان متقعش تكسر رقبتك

3 إسكرينه حلوة كده من الجديدة دى تحطها على مشاعرك علشان تحافظ على مشاعرك متنجرحش بسهولة و تتعود إنك متسبش مشاعرك أبدا بدون حماية و تعتمد على ثقتك فى اللى قدامك اللى أصلا إنت لسه متعرفوش اوع تستخسر في نفسك وهات اسكرينا اوريجينال

4 نضارة شمس براند بلاش بتاعة العتبة تلبسها علشان تحمى عنيك من تأثير نظرات الإعجاب و رغرغرة عيون ومحن الكلمات والمشاعر الملزقه من الطرف التاني و هو بيحكيلك عن إحساسه و ده هيخليك تشوف الصورة أوضح..
5 ???? درع من بتاع الحروب زمان المصفح ده تحطه على قلبك علشان تحمى قلبك من فيضان الحب و الأسهم اللى هتترمى عليك والطعنات والحبشتكنات والحركات علشان تثبتك..

6 ???? خوزة متينة تلبسها على دماغك علشان تمنع إختراق عقلك بسهولة و قراية افكارك و نقط ضعف و إستغلالها..

7 ???? أخيرا بقى خد مسافة بينك و بين الطرف التانى زى اللى بيسوق عربية أوعى تلزق فى اللى قدامك علشان لو اللى قدامك فرمل فجأة متتكسرش رقبتك مسافة إحتياطى وخد كمان عشان خاطري مسافه كمان

دى شوية حاجة نحمى بيها نفسنا من روعة البدايات قبل ما نلبس في خوازيق النهايات اللى بتعمينا نميز بين الكلام و الفعل يعنى جميل إننا نستمتع بأى علاقة جديدة لكن اللى مش جميل خالص إننا ندوس و نغرق فى بحر من الأوهام و الكلام بدون ما نحترم عامل الوقت اللى بيظهر حقيقة الناس و بدون ما نحترم قيمة الفعل اللى هو الإختبار الحقيقى لأى علاقة..

الصح إن الثقة بعد المعرفة الكافية المفروض هى اللى تدوب كل الحدود دى مش الكلام و إندفاع البدايات..

واحدة واحدة كل حاجة بالعقل حلوة

بنك التعمير
خالتك أنوش روعة البدايات