رولا خرسا تكتب ..عندي صدمة في الشيخ مبروك

انتقدت الإعلامية رولا خرسا الشيخ مبروك عطية في بوست على صفحتخا الشخصية وقالت "عندي صدمة في دكتور مبروك عطية..العالم الجليل اللي كنت حريصة علي متابعته لعلمه وخفة دمه"
مصدومة جدا من كلامه:

"لما المشايخ تكلموا عن الحجاب سمعنا من يقول حرية شخصية، كويس،المرأة والفتاة، تتحجب عشان تعيش، وتلبس واسع عشان متغريش، وغض البصر للرجال المحترمة، لو حياتك غالية عليكي اخرجي من بيتك قفة، لا متفصلة ولا بنطلون ولا شعر على الخدود، عشان وقتها هيشوفك اللي ريقه بيجري ويقتلك"

عارف معني كلامك يا دكتور مبروك؟؟؟

يعني انت بتدي رخصة لاي شخص انه يقتل او يتعدى علي اي واحدة غير محجبة؟؟؟
يعني انت شايف ان الحجاب هو الي حيحمي البنت؟ مش اخلاق الراجل الي ماشي في الشارع؟
يعني انت شايف اني معلمش ابني يحترم اي بنت الا لو محجبة؟
يعني انت شايف ان الي مش محجبة بنت مش كويسة؟؟

طب ما هو برا الستات بتمشي لابسة شورت ونفس الرجال الي هنا اما بيسافروا برا بيغضوا البصر عشان خايفين لاحسن يتمسكوا تحرش بالنظر..

دكتور مبروك ربنا ما فرقش بين الراجل والست غير بالقوامة يعني انه يكون مسؤول عنها ويصرف عليها.. ليه ما انكلمتش عن قلة القوامة وعن الرجال الي ما بيصرفوش على زوجاتهم ؟؟

وفرق في الورث :عشان المفروض -ودا ما بيحصلش -ان الاخ يصرف علي اخته..

وفي الشهادة :عشان الستات في وقت معين بيكونوا حساسين اكتر من اي وقت تاني..
غير كدة الراجل زي الست

حرام يا دكتور والله .. احنا بنعاني من الامخاخ الذكورية الي لا عايزة تحترم الست ولا عايزة تديها حقوقها تيجي انت نديهم رخصة انهم يقولوا شيخ مبروك قال….!!!!

فعلا..لا عزاء للسيدات… معانا ربنا.