رأي الحدث

طاهرة جمال تكتب..لغات الحب

كاتب المقال:  استشارى أسرى ولايف كوتش
كاتب المقال: استشارى أسرى ولايف كوتش

من يوم ماربنا خلق الدنيا وخلق سيدنا ادم وخلق له من ضلعه حواء وبدا إعمار الكون بزوجين متحابان ادم وحواء من اول الشتات والبحث عن بعض ولقائهم، ومن يومها والرجل والمرأة في رحلة بحث كل يبحث عن نصفه الاخر ليهدا ويهنأ بالعيش معه
لكن مع تطور الزمن وتعقيدات الحياة اصبح الأزواج في رحله تائهين من بعض رغم انهم تحت سقف واحد و عشان تقدر تعيش مع شريكك وتتعامل معه لازم تتقبله كما هو التقبل هو اول مرحله من مراحل العلاقة ويضمن استمرارها
ثانيا تعرف ايه لغة الحب الخاصة به.. ايوا متستغربوش من كلامي الكلام ده كتبه كاتب أمريكي متخصص في العلاقات اسمه (جارى تشابمان) في كتابه الشهير لغات الحب الخمسة
وترجم لعدة لغات وهو يلخص ان لكل شخص في الكون مدخل تقدر تدخلوا منه وتتعامل معه لذلك من الضروري معرفة لغة الحب الخاصة بشريكك لتضمن حياة سعيدة مليئة بالحب والاستمراريه وفى السطور القادمة استعرض لكم لغات الحب باختصار هم خمسه اساسين ويتفرع منهم لغات فرعيه او ممكن لشخص الواحد يكون له اكثر من لغة بنسب مختلفة وطبعا اللغات دي تنطبق على الرجال والنساء على حد السواء وفعلا من خلال رحلة عملي اكتشفت ان الرجال والنساء متساويين في لغات الحب الا بفروق بسيطة لا تذكر
اول لغه للحب (الوقت الخاص) أو (quality time)
ان الشخص يحب يقضى وقت خاص مع شريكه يعملوا حاجه مع بعض لعبه سفريه مشوار او ممكن كمان ان الشريك يسمح للأخر بانه يقضى وقت مع الأصدقاء ولو مره في الشهر ده هيعمل نوع من أنواع انتعاش للحياة وتجدد لها وممكن كمان يقضوا وقت لطيف مع بعض والأولاد في المدرسة ويخرجوا في مكان يشربوا حاجه فلو الشريك فهم لغة الحب دي وساعده ليها وعزموا على خروجه صغيره زي دي وتفرحوا وتجدد الحب
ثانى لغة للحب الهدايا
هنا بفتكر والدتي الله يرحمها كانت دايما تقول مثل شعبي بيقول انا غنيه وأحب الهدية
وسيدنا النبي صل الله عليه وسلم قال (تهادوا تحبوا) بمعنى ان الهدية لها معنى كبير في فتح القلب وتجديد الحب والود بين الشركاء حتى لو بسيطة لكن لها دور مهم لشريك بيحس انك فاكره وعلى باله وده مش نوع من أنواع الابتزاز او ان الشخص مادى ولكن دى طريقته في اظهار الحب واستقبال الحب طبعه كده وهو كمان بيظهر حبه بهذا الشكل .
ثالث لغه (الكلام الحلو والتشجيع وتقدير )
تجد هذا الشريك منتظر دائما من شريكه كلمه شكرا او كلمه انت تعبان عشانا احنا من غيرك منعرفش نعيش والكلام الحلو بالنسبة له له تأثير ساحر رغم تعب بكلمه حلوه يشيل جبل ومايقولش ااه وبيكون شخص ده حساس جدا ومتطلباته بسيطة وهى الاحترام والتقدير ولسان الحلو
رابع لغه تقديم الخدمة والمساعدة
بمعنى ان الشريك يساعد شريكه في شيء بيعملوا بشكل يومى مثل ان الزوج في مره ياخد الأولاد من المدرسه او تمرين بدل الزوجه او العكس ان زوجه تروح تعمل مشوار كان مفروض زوجها يعمل ودى لغه الحب عند هذا الشريك
خامس لغة والأخيرة (اللمس او الاتصال الجسدي )
ودى بقى بتنقسم لنوعين قسم هو الاتصال الجسدى بالعلاقه الحميمه وهنا الشريك بيحب ان شريكه يكون متفهم لاحتياجاته ويشاركوا فيها .
والقسم الاخر هو اللمس الجسدى كالاحتضان والطبطبه
وهنا الشريك مش دايما بيكون محتاج للعلاقه الحميمه كلغه من لغات الحب ولكن للتواصل العاطفى الجسدى مثال ان الزوجه كاستقبال زوجها بقبله او حضن او ان الزوج وزوجته تذاكر لاولادها ويقبلها ويشكرها وهنا يظهر لغتين من لغات الحب وهو اللمس العاطفى والاطراء
والخلاصة
ان الله سبحانه وتعالى قال هذا قبل تشابمان بزمن عندما قال رب العزة
(وَلَا تَنسَوُا الْفَضْلَ بَيْنَكُمْ ۚ إِنَّ اللَّهَ بِمَا تَعْمَلُونَ بَصِيرٌ) (البقرة: 237)،
إن مؤسسه الزواج قائمه على الفضل وليس الفرض و ان التواصل وحديث الشريكين في مشكلاتهم مع بعض ومساعده بعضهم البعض على معرفه ما يحبوا وما يكرهوا بيقرب مابيبعدتش لكن للأسف الصمت وعدم الحديث وطلب المساعدة من الأقارب والصحاب لحل مشكله بيكبرها ويهدم البيوت بالإضافة للإنكار وتكبر الأطراف على المواجهة لكن طلب المساعده من متخصص بيكون حيادى وبيكون متفهم لنوع المشكلات بيساعد الشريكين لنجاح علاقتهم في حاله استعدادهم للوصول لحلول .
طاهره جمال
استشارى أسرى ولايف كوتش